તાશના પત્તાના મહેલની જેમ ઈમારતો થઈ ધરાશાયી, હિમાચલથી સામે આવ્યા ભયાનક દ્રશ્યો

હિમાચલ પ્રદેશના કુલ્લુમાં ભારે ભૂસ્ખલનને કારણે અનેક મકાનો ધરાશાયી થયા છે. પહાડી વિસ્તારમાં થયેલા મોટા ભૂસ્ખલનમાં ધ્વસ્ત ઈમારતો અને મકાનોના કાટમાળમાં ઘણા લોકો ફસાયા હોવાની આશંકા છે. આ ભૂસ્ખલનનો એક ખતરનાક વીડિયો પણ સોશિયલ મીડિયા પર સામે આવ્યો છે. જેમાં પહાડની તિરાડને કારણે ખીણમાં મકાનો કેવી રીતે ધરાશાયી થયા તે જોઈ શકાય છે. ભૂસ્ખલનના દ્રશ્યોમાં અનેક બહુમાળી ઇમારતો ધરાશાયી થતી જોવા મળે છે. ભારતીય હવામાન વિભાગ (IMD) એ આજથી આગામી બે દિવસ હિમાચલ પ્રદેશમાં ભારેથી અતિ ભારે વરસાદની રેડ એલર્ટની ચેતવણી જારી કરી છે.

ભારે વરસાદ બાદ આજે નુકસાન થયેલા કુલ્લુ-મંડી હાઈવે પર સેંકડો વાહનો ફસાયા

રાજ્યના ઘણા ભાગોમાં સતત વરસાદ પડી રહ્યો છે, જેના કારણે રહેવાસીઓને હવામાનની ગંભીર પરિસ્થિતિનો સામનો કરવો પડી રહ્યો છે. જિલ્લામાં ભારે વરસાદને કારણે ક્ષતિગ્રસ્ત કુલ્લુ-મંડી હાઈવે પર આજે સેંકડો વાહનો ફસાયેલા છે. “કુલુ અને મંડીને જોડતો રસ્તો ક્ષતિગ્રસ્ત થયો છે. પંડોહ થઈને એક વૈકલ્પિક માર્ગ પણ ક્ષતિગ્રસ્ત થયો છે. તેથી, ટ્રાફિકની અવરજવર હાલમાં સ્થગિત છે,” કુલ્લુના વરિષ્ઠ પોલીસ અધિકારી સાક્ષી વર્માએ સમાચાર એજન્સી ANI દ્વારા ટાંકીને જણાવ્યું હતું.

हिमाचल प्रदेश के कुल्लू में भीषण भूस्खलन, आनी कस्बे में ताश के पत्तों की तरह ढह गई रिहायशी इमारतें#HimachalPradesh #KulluLandslide pic.twitter.com/ZMdb3ZtL3v

— NDTV India (@ndtvindia) August 24, 2023

હિમાચલમાં ભૂસ્ખલન, વાદળ ફાટવા અને અચાનક પૂરના કારણે મોટી તબાહી

અવિરત વરસાદે પર્યાવરણીય રીતે સંવેદનશીલ પહાડી રાજ્યમાં ભૂસ્ખલન, વાદળ ફાટવા અને અચાનક પૂર સાથે વ્યાપક વિનાશ સર્જ્યો છે. રાજ્ય સરકારે અગાઉ સમગ્ર રાજ્યને “કુદરતી આફત અસરગ્રસ્ત વિસ્તાર” તરીકે જાહેર કર્યું હતું અને નુકસાનનું મૂલ્યાંકન કરવા અને અસરગ્રસ્ત લોકોને રાહત આપવા માટે કામ કરી રહી છે. આ ચોમાસામાં ભારે વરસાદને કારણે કુલ 709 રસ્તાઓ બંધ થઈ ગયા છે. હિમાચલ પ્રદેશ સરકારનો અંદાજ છે કે 24 જૂનથી રાજ્યમાં ચોમાસું આવ્યું ત્યારથી અત્યાર સુધીમાં જાહેર માળખાગત સુવિધાઓને કુલ રૂ. 8,014.61 કરોડનું નુકસાન થયું છે.

વરસાદને કારણે 2,022 મકાનોને સંપૂર્ણ નુકસાન થયું છે

રાજ્ય સરકારના આંકડાઓ અનુસાર, વરસાદને કારણે 2,022 મકાનોને સંપૂર્ણ નુકસાન થયું છે અને 9,615 મકાનોને આંશિક નુકસાન થયું છે. રાજ્યમાં 113 ભૂસ્ખલન પણ નોંધાયા છે, જેના કારણે માળખાકીય સુવિધાઓને વ્યાપક નુકસાન થયું છે અને હજારો લોકો વિસ્થાપિત થયા છે. એક સરકારી બુલેટિનમાં કહેવામાં આવ્યું છે કે વરસાદને કારણે 224 લોકોના મોત થયા છે, જ્યારે 117 અન્ય લોકો વરસાદ સંબંધિત અકસ્માતોમાં મૃત્યુ પામ્યા છે.